Azərbaycanın “Eurovision-2010” mahnı müsabiqəsində təmsilçisinin seçilməsi üçün milli final konserti başlayıb. ANS PRESS-in verdiyi məlumata görə, təmsilçimizi və ifa olunacaq mahnını seçməli olan münsiflər heyətinin üzvləri sırasında yer alan Üzeyir Hacıbəyli adına Bakı Musiqi Akademiyasının rektoru Fərhad Bədəlbəyli isə tədbirdə iştirak etmir.
“Eurovision” müsabiqəsi üzrə Azərbaycan nümayəndə heyətinin rəhbəri Adil Kərimli ANS PRESS-ə bildirib ki, Fərhad Bədəlbəyli səhhəti ilə bağlı yaranan problemlərlə əlaqədar bu gün “Buta Palace”da keçirilən milli final konsertində iştirak edə bilmir. Adil Kərimlinin sözlərinə görə, Fərhad Bədəlbəyli konsertdə bilavasitə iştirak etməsə də, qalibin müəyyən olunması üçün keçiriləcək səsvermədə qiyabi iştirak edəcək.
Bu gün “Eurovision-2010” mahnı müsabiqəsində Azərbaycan təmsilçisi və onun ifa edəcəyi mahnının seçilməsi üçün milli final keçirilib. “Buta Palace”da baş tutan milli finalda Səfurə Əlizadə münsiflərin müsbət rəyini qazanaraq mayın 27-də keçiriləcək 55-ci “Eurovision” mahnı müsabiqəsinin II yarımfinalında Azərbaycanı təmsil etmək hüququ qazanıb.
Azərbaycan təmsilçisi və ifa olunacaq mahnı İTV-nin baş direktoru İsmayıl Ömərov, Üzeyir Hacıbəyli adına Bakı Musiqi Akademiyasının rektoru Fərhad Bədəlbəyli, Azərbaycan Dövlət Filarmoniyasının direktoru Murad Adıgözəlzadə, Beynəlxalq Musiqi Şurasının Azərbaycan Milli Musiqi Komitəsinin prezidenti Lalə Kazımova, dirijor Azad Əliyev, Mədəniyyət və Turizm Nazirliyinin nümayəndəsi Mənzər Nurəliyeva, Gənclər və İdman Nazirliyinin nümayəndəsi Fərhad Hacıyevin daxil olduğu münsiflər heyəti tərəfindən seçilib.
Milli finalda Səfurə Əlizadə, Məryəm Şabanova və “Milk&Kisses” qrupu “Cancelled”, “Don’t Let The Morning Come”, “Drip Drop”, “Soulless” və “Under My Skin” mahnılarını ifa ediblər.
Konsertdə qonaq qismində Gürcüstanı “Eurovision-2010” müsabiqəsində təmsil edəcək Sofo Nijaradze və Rusiyanın “Fabrika zvezd” layihəsinin iştirakçısı Dakota iştirak edib.
Milli final konserti Azərbaycanın İctimai Televiziyası, Türkiyənin TRT və Gürcüstanın İctimai Televiziya kanalı ilə canlı yayımlanıb.
